l’assassiniu d’abeli
Si lu taliava suppisannu n mani
un piscazzu firrignu, nzanguliatu.
Lu vidìa n terra, sdissangatu , ittatu
a fanci com’un chìchiru di pani
e s’u studiava; ’un si capacitava :
picchì ddopu dda bbotta nun hiatava?
Picchì ddu stari fermu ?Ddu taliari
sempri n da un puntu e nun vìdiri nenti?
Ddu canniari di muschi nzistenti
n capu la facci e ’un sapilli cacciari?
’Un ci dava fastiddiu? ’Un s’azziddava?
E ll’occhi picchì aperti? A ccu ammirava?
Ma po’ anchi dda facci stracangiata
d’a bbotta, strasattata, di nnuccenti
ca parìa diri : “ Nun ci curpu nenti!”
cci mprissiunava l’arma sbarattata.
E suspittusu ’un hiatava taliannu
si quarcunnu cci vitti fari ddanu.
Puntava l’occhi a mani ritta a manca
sutta a farrubba, n mezzu lu frummentu
e arrisantava, si pi casu, u ventu
lu mpruntava cu na cima nni l’anca.
E accussì, contu, senza diri cìu,
scanzava tutti e cchiù l’occhiu di Ddìu.
Tuttu ddu sangu l’avia mriacatu
lu fururi, la rraggia , ddu mumentu…
so frati ca currìa n mezzu u frummentu
iddu darrè ca , sudannu nfuriatu,
cci iva appressu a tagliaricci a strata
fina chi l’accrastà nni l’acchianata.
E quantu cchiù nun ci vulìa pinzari
cchiossà ddu fattu si cci appalisava
avìa davanti ogni cosa : a tuccava,
sintiva chiaru a so’ frati gridari
e iddu ca dicìa : “ Nun ti scassari!
c’anchi ca gridi cu ti po’ ascuntari?”
Cci spirriava u vrazzu darrè a schina
cci l’aggangava e chiddu ntinniava,
cci stringìa a gula, cci nturciniava
u coddu …cafuddava nn’a carina
cci sputava , u gracciava, u muzzicava
ma quali ! Nenti! e so’ frati gridava
Nun lu putiva propia suppurtari
cci struttiglià na gamma, cci a stuccà,
cci aggrampà un pedi, un guvitu , u cunzà
caa taliallu faciva scantari…
Po’ ncucciatu un mizzagnu , u livà,
cafuddà n testa e Abeli attarantà.
Si lu vitti ammuddari nzanguliatu
càdiri tortu cu ll’occhi a lu celu
ca si pirdìa luntanu sutta un velu
di sciloccu gravusu ed accupatu.
Capì ddu iornu Cainu, pi sorti,
chi s’av’ ha’ ffari pi ddari la morti.
Lordu di sangu, sudatu, affannatu
talià a so’ frati:’un si cutuliava
l’ammirà ggiustu, vitti ca ’un hiatava,
lu tuccà, u chitià…Nenti! Mpalatu!
Sgriddannu l’occhi lu scutì , u chiamà,
ma u mortu stetti. ’Un si cataminà.
Po’ mentri s’asciucava lu suduri
e lu sangu pinzà… “ Si mi bbabbìa?
U sconzu!” E n d’o n’occhiu pi tinturìa
cci spunnà un cippu a faricci duluri;
e arrifrittì : “ Si chistu ’un s’ha’ azziddatu
e ’un senti ,voli diri ch’ è astutatu!”
A un certu puntu si ntisi chiamari
di darrè un cozzu e si palarizzà:
’un sapìa chi pinzari ed addizzà
versu na macchia; si cci ì a ntruffari.
E ristà mutu, li vrazza ammuddati,
la vucca aperta, l’ucchiazzi sgriddati.
Mentri lu scantu s’u stava allistennu
si sintì diri: “Cainè , a tia dicu,
chi ffa’, po’ nèsciri di sutta a ficu
ca tanta frutta ’un c’è? Chi va facennu?
Ti vuliva parlari na rrancata,
si tempu ’un ha’, tornu l’antra iurnata?”
Nn’u sèntiri dda vuci canusciuta
Cainu suspirà, dissi “ Cci cridi
ca m’aviva scantatu? Vossia arridi…
ma vidissi ca veru si tramuta
cu si senti scututu ’un vidi nenti
e senti sulu na vuci mpunenti
’Ossa vidi ? Cca sugnu ! Quant’anuri!
E scinni n tra di nantri poura ggenti?
N Paradisu cci stuffa ’un fari nenti
– dici – “ Sbarìu!” E veni cca u Signuri.
I speru sulu ca nun si nni penti.
Chi bboli? Cca ’un ci su divertimenti,
cci su’ travagli, cc’è a gastima ittata
di scuttarisi u pani c’u suduri
e nun c’è un cani ca ti fa u fauri
dicennuti : “T’aiutu na rrancata!”
Vossia dda n capu avi l’antri chiffari…
po’ stanca…“ Scinnu!” E ven’a sbariari.
Megliu accussì Ed ora ch’è cca iusu
e vidi tuttu, nenti sapi fari?
I sempri a curpa ’u pumu m’è scuttari?
I ca ’un ci stetti un attimu dda ssusu?
Si nun mi nni mangiavu? Si nun c’era
Si mancu sappi ’sta frutta com’era?
A me’ nascita fu supirchiarìa,
’ossa vidi chi fu? I ’un ci haiu piaciri.
Chi cci vuliva sapirimi diri
ca ’sta vita è travagliu…furniscìa…
No ca p’amuri di me’ pa’ e me’ ma’
mi scassu a travagliari e viu guà!
Bbonu cci pari ? M’avissiru dittu
“Vo’ nasciri Cainè?” Cci arrispunnìa:
“Picchì stati circannu propia a mia?
Chi cosa nasciu si po’ staiu affrittu?
Fin’ora una nun l’atu nzirtatu
u Paradisu…lu pumu…u piccatu…
Picchì di chissu si tratta: si sa
ca a tia la vita ’un t’ha’ arridutu nenti
chi va’ facennu nasciri nnuccenti?
Lassali arrisiduti. Chi cci fa?
N tantu me’ pa’ mi dici: “Si’ carusu!”
“Ma picchi?” “Nenti!” M’acchiana un nirbusu…
Comunqui bbasta ! ’Un A vogliu siddiari
cuntànnucci quali gadduna passu.
Vossia d’artrondi si manteni arrassu
d’ognu ngustia, po’ scinni a sbariari
ca ’un voli furniscìi…mmah ! Chi dicìa?
Aviva, forsi, bbisognu di mia ?”
“Ora bbasta! To’ fratuzzu è ittatu
n terra comu n’anceddu a primu volu
scunzatu, sdissangatu, n capu un violu
ca d’u so’ sangu virginu è mpastatu.
Picchì u facisti? Chi mali ti fici?
Picchì nun mi chiamasti? ’Un semu amici?”
“Amici? Nonzi! Nun ci amu ma’ statu.
Chi amicu è Vossia si mi cunnanna
pi curpa di me’ pa’? Picchì mi ddanna
n cumpagnia di tuttu u parintatu?
Picchì mi renni la vita ngustiata
si fina l’aria mi veni scuttata?
Taliassi ’stu frummentu c’ haiu davanti:
frummentu è chistu? Tuttu arriscinatu!
Taliassi ’st’ortu: lu vidi ? E’ agghiaiatu!
E i la terra, lu frummentu, i pianti,
l’azzappu! Ed anchi si ssi nni sta arrassu,
si nn’addunatu comu mi cci scassu?
Ogni iornu accussì, annati sani
d’u chiaruri di l’arba a lu scurari
a sputaricci sangu a travagliari
pi pirsuadila a dàrimi ddu pani
ca un iornu spurnu gaimu,abbrusciatu,
bbianchinusu, cottu, accravunatu…
Eppuru, di ddu tecchia chi la terra
m’ha datu, a stentu, e pi lu me’ suduri
haiu dittu :“L’ è òffriri o’ Signuri
anchi si la miseria mi nzerra
anchi si ’un si nn’adduna ma’ di mia
picchì nun m’ama o m’avi n simpatia”.
Cc’era bbisognu, ogni bbota, ca u fumu
d’ u sacrificiu ch’i facìa a Vossia
m’avia iri nni ll’occhi e mi l’ardìa?
’Un voli? Nenti! I mancu focu addumu!
Ma no però ca m’av’ ha’ disprizzari!
Cosi me’ nun nni voli ? E i lassu stari!.
E ad Abeli ca certu mi vidìa
nirbusu, sudatu, murtificatu
nni l’offerta sincera…scunzulatu…
cci diciva: “Picchì?” ’Un m’arrispunnìa.
Anzi vidennu ch’era cumbunnutu
aviva un risuliddu cumpiaciutu
ca nun addivintava ma’ spalisi
arridìa dintra mi capisci? N cori.
Tantu ca ’un si sirbiva d’i palori:
tuttu di la so’ facci era spalisi .
Era sicuru, rrudusu, affirmatu,
avìa lu rrisu du rraccumannatu.
Era cuscenti di chissu, e gudìa
di l’aiutu chi cci dava Vossia.
Era cuscenti. E ’sta supirchiarìa
i comu un pisu murtali a patìa .
(Si semu frati, picchì Abeli sulu
avi l’aiutu so’? Chi sugnu i, mulu?
Forsi ca ’un haiu la stessa dignità?
Picchì trattari mali sempri a mmia?)
I ’un sugnu tintu, ma si mi spirrìa
nn’a facci nun taliu mancu a me’ pa’.
E quannu dopu mi callia lu senzu
comu mi veni di pinzalla a penzu.
Abeli era Vossia! Era a cunnanna
d’a terra sicca, era me’ pa’, u parrinu
di lu Vuliri So’! Chistu distinu
ca mi sbatti comu foglia di canna !
Era la risatedda, a sarsiata
a li stenti di tutta la iurnata.
Lu livavu di n mezzu. L’ammazzavu
comu s’ammazza un cani. Alliggirivu.
Lu fici cu piaciri. Cci gudivu.
E pena ’un haiu cci dicu: arrifriscavu!
Nun avia dignità, era mischinu
ruffianu, farsu, mbamazzu, licchinu.
Un omu ’i nenti! Mi voli ammazzari?
Cca cc’è u puntali ancòra nzanguliatu:
na bbotta sicca. Un corpu assistimatu
nn’a cruci a frunti e levu di campari.
Occhiu pi occhiu.’Un è chissu u castìu ?
Un corpu, forza. E mancu dicu cìu”.
“Ma chi dici Caì ? Sugnu l’arcanu,
lu Misteru Viventi, l’Infinitu
ca si fa nicu quant’ugnu di itu
e di nenti si fa granni supranu.
Chi cosa vo’ capiri? Chi bbo fari?
Si nun ha’ fidi nun mi po’ n cucciari.
Talè ietta ’sta rocca, pi fauri ,
e veni ca ti signu.’Un ti scantari.
Abeli è mortu, ma i è rricupari
tutta l’umanità d’u to’ duluri.
Nenti ti fazzu: ti lassu campari
e criu ca chista pena po’ vastari”.
Accussì dissi. E p’a so’ rrisidenza
si nn’acchianà u Signuri suddispattu
di la pacenzia avuta nni ddu fattu,
d’u garbu usatu, d’a cumminienza
fina di fronti a rraggia di Cainu
disgrazziatu e nfilici assassinu.
Ddopu ’stu fattu si sintìa cangiatu
si sintìa scunurtatu, si taliava
l’ortu, u frummentu, Cainu, e tistiava
era stancu, abbattutu, amariatu,
pinzava: “Bbonu cchiù, mi fazzu cuntu
ca cchiù travagliu e menu cci la spuntu.
Bbonu! Vol diri ca nun è distinu
iri appressu a la terra, travaglialla…
a facissi me’ pa’, si voli falla,
nun è misteri me’ lu cuntadinu.
Ma si nun fazzu chissu, chi haiu di fari?
Chi cosa pozzu fari pi campari ?
U cacciaturi, forsi…u picuraru
chi arti cci voli a pasciri li crapi?
Purtalli nni li margi unni si sapi
ca l’erba è dunci e crisci paru paru…
Abeli u sapia fari…e forsi …ancora…
s’un fussi mortu…Chi cci trasi ora ?
Picchì u muntuu ? Chi meriti avìa ?
Fàrisi uddiari. Ed ora ’un pupiddia
mancu l’occhi p’i muschi; ’un si canzìa
si cci fazzu attu…è fermu; ’un griddulìa…
Iddu s’u vonzi! Ma com’è ca fa
a stari fermu ? ’Un si stancari ma’?
E ’sta morti chi è? Chi bboli diri
’un s’azziddari mancu p’u duluri ?
’Un diri bizzi, ’un cangiari culuri
aviri u senzu e ’un sapiri capiri ?
E la so’ ntillicenza, u so’ parlari
cu si li nzerra ? Cu mi li po’ ddari ?
Partì, arrivà u truvà n capu u violu
comu l’avìa lassatu: sdirrupatu.
Appi na fitta a vìdilu stuccatu
e arramazzatu dda com’ un cagnolu
e cu pena u chiamà “ Sùsiti, ’un stari
accussì n terra ; ti vinn’abbrazzari!
Sùsiti, bbeddu me’, sùsiti u frati !”
E s’u stringìa, cci vasava i capiddi,
cci circava nni ll’occhi li faiddi
lesti di vita, ma i ggiglia sirrati
nun si graperu. Nni dda sirintina
si ntisi u friddu ilari la schina;
e un chiantu mutu cci acchianà di n cori
lentu, funnutu, gravi, scunzulatu.
Un sintimentu novu mai pruvatu
ca cci nzirrà nn’a gula li palori
e si scantà: Abeli ’un s’azziddava:
tuttu u duluri so’ nun lu tuccava.
E capì ca ristà sulu. Ddu chiantu,
ca fin’a tannu cci stetti accupatu,
si scatinà furiusu, scunurtatu,
gridatu o’ munnu ed a li stiddi. Gantu.
E si mazziava ’un sapiva carmari
la gutta ; e arrafatà p’arripitari.
A lu lustru d’a luna, p’a trazzera
scrupì la figuredda di so’ patri
ch’ iva gridannu : “Abeli!” ed a so’ matri
ca, quannu vitti ddu carusu unn’era,
ammuddà tutta, cci mancà u suspiru,
cadì, abbuccannu, e si tinni n d’on ggiru.
La facci bbianca si vilà la luna
vistennusi di luttu; e pi lu munnu
s’allargà u chiantu d’un duluri funnu
c’azziddava li stiddi ad una ad una .
Si pirdiva accussì nn’u scuru chinu
anchi l’arripitari di Cainu.
Serafinu Candore
( fu Luvici
e fu Stancante Rosa Sarbatrici
nullatenente )
“Ciccì cca mpettu nn’u mezzu d’a maglia
cci haiu un duluri ca staiu arraggiannu !”
“Sarafì è friscu! Si va rrandiannu…
Nenti è ! Si’ sanu com’un spicchiu d’aglia!”
Muri di nfartu.
Fu chiamatu lu medicu ggià quannu
ddu criaturi cu ll’occhi sgriddati
la vucca aperta e li mani ammuddati
accumnciava a iri allignamannu
comu na travi.
“E i ch’è fari? Chiamati u parrinu –
dissi u dutturi – E’ mortu! Vi salutu”.
E si nni ì. Lu mortu fu vistutu
c’ u vistitu di quann’era spusinu.
Cci vinìa bbonu.
L’arma di Sarafinu ’un suppurtannu
di stari nchiusa pi l’eternu abbentu
dissi: “ Mi susu, fazzu muvimentu
ca li gunocchia mi stann’accruccannu
e ’un mi li sentu”.
Fici du’ passi. E circannu nn’i rrobbi,
truvà un linzolu arraccamatu a manu
si l’agliummarià. Paria un rrumanu:
po’, fattu un santu n capu u guardarrobbi
di n terra chianu
sulu e n silenziu ’i dda n capu taliava
lu corpu minutiddu n capu u lettu
lu rrusariu nn’i mani e nni lu pettu
un hiuri ca ’un fitiva né adurava:
musciu precisi.
A firriari ntunnu o’litticeddu
lu figliu,la muglieri ncupunata,
Marianna,la figlia divorziata
(pi curpa d’u maritu) e un vicineddu
orbu d’un occhiu.
’Un chiangìa nuddu. Stavanu assittati
a tistiari senza cidimentu,
a hiuhiarisi u nasu senz’abbentu,
a cuntari i maduna hiaccati…
senza cimentu…
Ogni tantu un suspiru arrafatusu,
na paluredda mezza muzzicata,
na cacciata di muschi, na taliata…
e dopu arrè: un suspiru accupusu
d’armalu stancu.
Ma dici u chiantu! Ca quannu si senti
ti fa accapiri ca un cori sta mali,
l’arripitari, u gridari…ma quali!
Di ’st’articuli cca nun c’era nenti
mancu mprustati.
Di n capu u guardarrobbi Sarafinu
vidìa, siddiatu comu na Maria,
tutta dda scena: si vidìa e ’un cridìa
d’essiri iuntu a fini d’u caminu
a’ muta surda.
“Ma comu?! I moru e nun sugnu chiangiutu?
Nun è ca partu tornu e nni videmu?!
Ma mancu n cartulina! Nni spartemu
n’eternu. Vantri cca i nn’u tabbutu
sempri, Pi sempri.
Capaci dopu un misi, du’…tri anni,
vi nn’addunati ca mancu e chiangiti,
ma ’un è lu stessu d’ora, mi capiti?
I ora staiu murennu. A sissant’anni.
Nni ’stu mumentu.
E nun pinzati o’ bbeni c’haiu vulutu
a tutti vantri? Comu vaiu nzirtatu
ogni disìu? Quantu v’haiu aduratu?
Forsi ca i nun v’ haiu arrinisciutu?
I, iurnataru?
A Luviciuzzu u lassu depromatu
(maistru elementari) certu doli
sapiri ca ogn’annu di li scoli
si nesci ormai pi fari u spacinnatu,
ma i ’un ci curpu.
Si u distinu la vonzi ddevorziata
(nn’u matrimoniu cci voli furtuna)
quannu me’ figlia acchiana i so’ scaluna
nun metti pedi nn’a casa addutata
p’i me’ sudura?
E me’ muglieri? Comu! Nenti nenti
prova c’ora la lassu e mi nni vaiu
dopi tant’anni aniti? E d’unni vaiu
nun tornu mancu cu i bummardamenti?
No? nenti senti?
Perciò dopu na vita, tantu stentu
patutu pi ’stu schifu di famiglia
i moru, friddu pi na meraviglia,
e nun c’è nuddu ca rii un lamentu?
Cu mori, nuddu?
Ma anchi pi occhiu di li cristiani
chi sacciu… fari a finta…l’affacciata…
ma quannu ma’! Dda lorda è ncupunata
e ’un mi talìa mancu si fussi cani.
Cci fazzu schifu!
Orbu di l’occhi ca si mi truvassi
cu i vivi e ’un fussi ddu spiritu puru
chi sugnu ora, unni moddu e unni duru
a via di scafugnuna la lassassi,
ma sugnu un’arma.
Ma picchì ’un canti e ti metti a bballari ?
Armenu fa a sincera gran bbagascia!
Nesci, sbarìa, va dillu cu a rrancascia
ca si cuntenti e po’ lassami stari
sulu cu mmia .
Cci vuliva la morti pi sapiri
chi putenza di bbeni m’ha bbulutu!
Comunqui bbasta! Quannu cc’è u tabbutu
mi cci nchiuiti e mi lassati iri
p’a nnicchia sulu.
E nun mascariati la bbalata
cu frasi tipu :” Semo frastornate,
torna, c’avemu i cuore frandomate”
ca ’un c’è bbisognu di ’sta bbuffunata.
Lu nnomu e i dati.
Lu nnomu, i dati, e, s’u vuliti fari,
un ritratteddu.C’accussì la ggenti
taliannulu, rricorda li mumenti
amari o dunci ch’i cci sapi dari.
Mara cu mori!
L’Angiliddu custodi a chistu puntu
cci dissi: “ Sarafì, chi ffa’, nni iemu?
Si sta facennu tardu, nun facemu
ca po’ nni fannu quarchi malu affruntu?
si ritardamu!?
Dda unn’è ca iamu la puntualità
la rispettano e a vonnu rispettata:
e sperciarmenti di n’arma criata
la vonnu chista prova ’i civirtà
depone bene”.
“ Tu lu sapiatu ca la me’ famiglia
era accussì ?” Ma l’angilu cci misi
un itu n capu i labbra, e d’u paisi
si nn’acchianaru pi na meraviglia
mani cu mani.
Acchianavanu leggiu. Sarafinu
mentri gudìa d’u fattu ca vulava
cci dispiaciva ca s’alluntanava
di li cosi chi un tempu appi vicinu
e amava ancòra.
Taliava u hiumi, lu munti, li serri
fàrisi sempri cchiù nichi. I sbidìa,
li cumbunnìa cu l’antri, si pirdìa
circannu i macchi scuri di li terri
c’avia azzappatu.
Po’ i nevuli cci mpannaru a vista
di li cosi saputi e fu purtatu
a un munnu biancu di nivi ammantatu
di luci e hiuri a pèrdita di vista
e di silenzi.
E di ddu munnu bbiancu mmaculatu,
senza sòffriri né friddu né callu,
arrivaru a un purtuni di cristallu
e di puru alluminiu anodizzatu
laccatu bbiancu.
Nn’u mezzu d’u purtuni na targhetta
dicìa: “Rregnu dei Cieli – Paradisu –
e sutta di dda scritta cc’era misu :
“Siti prigati d’un mi fari fretta
c’u campanellu!”
“Chistu è San Petru – dissi l’Angileddu –
sempri artaratu. Chi si cci po’ fari?
Ora è rannuzzu e si ssi metti a sdari
cu cci cummati? Sona adasciareddu
quant’ un s’annerba.
Mischinu! Sa’ quant’avi chi travaglia
sempri cu i chiavi a gràpiri, nzirrari,
a cuntrullari cu veni a tuppiari
a nun fari passari cu si ‘sbaglia’ ?
Mancu iddu u sapi.
“Ma chistu postu – dissi Sarafinu –
comu l’appi pi causa di sirbizziu?
Mi pari ch’ iddu patì lu supprizziu
d’a cruci, ma cu la testa appininu.
Passà di rrolu?
E s’è capaci è rriccu. U vintisetti
l’avi sicuru, travaglia, sta bbeni,
è n Paradisu e tassa ’un ci nni veni…
chi cerca cchiù? Nun sunnu sordi netti
franchi di spisa?
’Un mi putissi aiutari lu Signuri
c’haiu a me’ figliu ca si firma sbaglia?
Pozzu spirari ca un iornu travaglia
a fari scola? Vidi?’ Stu duluri
nun lu vulissi”.
Si grapì lu purtuni e niscì lentu,
largu di spaddi, gantu, nfatiatu,
un vecchiu ca dop’avillu stimatu
ci dissi: “Mi faorisca un ddicomento
senza ’un si trasi.”
Sarafinu sintennulu parlari
trimava comu na foglia a lu ventu,
nun arriggìa, pruvava u sintimentu
d’ èssiri nenti e a sèntisi taliari
s’abbarsamava.
(“San Petru, u vidi?E cci sugnu davanti!!!
Com’è ffari ca nun sacciu chi ddiri?
Angilinè mi veni di murìri
mantenimi sinnò ci abbuccu avanti
persu precisi”)
“Picchì t’agliummariasti di rrumanu?
quannu muristi? Nun fu ’sta matina?”
“Antura propia! E novi! ’Sta matina
e ’stu linzolu nenti…chi rrumanu!
Mi parsi bbonu
e cummigliavu li vrigogni.Nudu
m’affruntava (chi persi la russura?)
E siccome mmattì ’sta cugnintura
u sapi? p’un vinìri nudu e crudu…
chi fici mali?
“D’unn’è ca veni tu?” “ Di Rafadali”
“Pruvincia?” “D’Agrigentu”. “ Ah si, Agrigentu.
Nun si trova n Sicilia? Si. Agrigentu,
chi bburdellu chi fannu ’sti murtali
di giurgintani.
Gridanu p’ogni cosa, mmernu, estati…
p’a Valli, lu Teatru, la Curtura…
pi l’acqua ca nun c’è… p’a fugnatura…
la cunnutta di Gela… i casi, i strati…
poura ggenti!
Tu dicisti ca si’?” “ Di Rafadali”.
“Ah ggià, si , certu. Mi l’avìa scurdatu.
Di Raffadali. Ma p’u to’ passatu
è vìdiri chi dicinu l’annali;
quannu nascisti?”
“ Sugnu d’u vintitrì: setti di Giugnu”.
“ U scrivu : vintitrì misi di Giugnu
iornu setti dicisti?” “ Setti Giugnu”.
“ Setti, se’, vintitrì”.“ Sissi di Giugnu”.
“Candore, Giugnu”.
Trasiti, si, però m’arraccumannu
ristativinni cca darrè u purtuni.
I viu dda n capu chi dici u Libbruni
scinnu c’u passaportu e po’ vi mannu
pi l’alti speri.
Cusà pirdissi tempu, ’un vi scantati:
pozzu tardari. Però cca vicinu
cc’è u ‘Bbar del Regno’ fannu un cappuccinu
ch’è bbonu veru e mentri l’ordinati
v’arripusati.”
P’un stari fermu com’un sarsuluni.
l’Angilu si vuntà cu Sarafinu
dicennucci : “Iamu p’u cappuccinu?
Si nun c’è postu u pigliamu o’ bbancuni.
Chi cci vo’ brioscia?”
Traseru. U ‘Bbar del Regnu’ era affuddatu,
ma senza vuci, senza cumbusioni.
“Desidera?” Fici l’urdinazzioni,
finì i parlari e l’appi amministratu.
Na meraviglia.
Propia vicinu a lu so’ tavulinu
(senza vulillu) si truvà ascuntari
du’ santi ca d’u modu di parlari
parìanu’i Napuli o di dda vicinu:
eranu amari.
“ Sono settecent’anni san Rafè
settecent’anni che cantiamo: “ Osanna
Allelluia al Signore! Osanna! Osanna!
Allelluia il Signore è il Re dei Re!”
Me so’ scucciato!”
“Pur’io, ma non è mica solo quello!!
Io suono pure! Il cerchio, il sonaglino…
All’età nostra fare il canterino
con i sonagli! E poi quel tamburello
così volgare!
Volete francamente il mio pensiero?
Ecco: scusate, ma’sta cosa qua
per tutto il tempo dell’eternità
mi sa di dannazione. Nun è overo?
Vuie che dicite?
Per carità qui non è in discussione
la gran bontà di Dio( questo è normale
e merita ogni lode universale),
ma questo coro qui è una fissazione
e il sonaglino…
Qualche cosa bisognerà studiare
nuie nun putimmo sta sempe a cantà!
Vuie capite; l’ idea d’eternità
stando così le cose, fa tremare.
Ma simmo sceme?
E n’ata cosa: m’è parso capire
che questo Regno, questa Monarchìa
dei Cieli, insomma questa Tirannia,
prima o poi dovrà pure finire,
non è gradita.
Amano la Repubblica i beati.
Tanti per non patir la Monarchia
scelgono il Limbo. Vi sembra follia?
Pure è così. Vivono da esiliati,
volutamente.
Si, certo, è tutto da verificare
che, a volte, sai com’è? Na cosa ’e niente
per la sola ragione che si sente
diventa vera. Bisogna appurare
prudentemente.
Però il fatto che cc’è ’sta dicerìa
poco mi garba. Posso aver capito
anche male che non ho più l’udito
d’un tempo…sarà pure fesseria…
ma cc’è ’sta voce”.
L’Angilu si vuntà cu Sarafinu
cci fici attu : “Susiti nni iamu”.
“Aspetta ca finivu, ma ’un pagamu?
“No, cca ’un si paga. Iamu nni Pitrinu
ca, forsi, aspetta”.
Nisceru. Ma vidennulu siddiatu
l’Angiliddu cci dissi: “ Sarafì,
i lu capisciu picchì si’ accussì,
unni de gghiè cc’è lu pumu tuccatu
ci cci vo’ fari?
Ascunta chistu fattu comu va:
a Repubblica a Cammara, u Senatu
dànnu a li santi un putiri allargatu
ca ’stu Cuvernu ’un duna. Tuttu cca.
E c’è maretta.
I santi ormai su’ politicizzati
e chiddi Italiani speciarmenti
vonn’essiri Ministri, Prisidenti,
Sigritari di Statu, Ddibbutati,
Sovrintendenti…
Ma u fattu bruttu chiddu cchiù mpurtanti
(ca duna e’ nerbi propia) è la mancanza
di santi novi ca stannu ad ortranza
a ffari vuci comu scioperanti
iusu nn’u Limbu.
Capisci? U Patr’Eternu è preoccupatu
anchi p’i santi c’ora sunnu cca,
ma ca sintennu ’sta pubblicità
ponnu lassari u Rregnu sbacantatu
filannusilla.
Si nescinu cu resta n Paradisu
oltri a Madonna, lu Spiritu Santu
u Figliu, San Giseppi e quarchi santu
(parenti strittu) ca cci fa bbon visu?
Quasi ca nuddu.
E si po’ fari un Regnu di letizia
cu li santuzzi chi stannu affunciati,
cu li cori di l’Angili nichiati
comu si fussi un Rregnu di gravizia?
Dillu tu stessu!”
“Su’ santi ed hannu ’stu gran mangiascinu?
’Un u capisciu! E chi cci vennu a ffari?
dici…“ ’Un mi piaci!” “ Ti nni po’ rristari!”
Ah no ca n Paradisu cc’è un casinu!
C’u s’u cridìa?
Ngilì quant’avi ca lu munnu è munnu
sempri Rregnu dei Cieli s’ha chiamatu!
’Sta Rrepubblica cu l’ ha muntuatu?
Ora chisti, pi mmia, santi ’un ci sunnu
su’ bburdillisti!”
San Petru, nn’u frattempu, iva arrivannu
cu ll’occhi vasci, mutu, lentu, musciu,
tinennu un bacu, ma nun c’era scrusciu
di cosi bboni ca iva tistiannu
com’un vo’ stancu.
Quann’arrivà cci dissi: “ Sarafinu
ascunta: vidi chistu ncartamentu?
L’Onniputenti voli un chiarimentu
portaccillu è nn’u tronu Cristallinu
Settimu Celu”.
(“E quali chiarimenti po’ vuliri
So’ Maistà ca mi voli parlari ?
Maria! Maria! Chi m’av’addumannari?
Sbagliavu? E unni? Cu nni po’ sapiri?
Ngilì mi scantu!”)
Di celu n celu unniannu, allargannu,
na musica prizziusa s’u purtava
sempri cchiù gantu e si l’accumpagnava
pi vvii ca sulu li santuzzi sannu
e u Patr’Eternu.
Quann’arrivà cc’eranu ad aspittallu
lu Patri Unniputenti, milli santi
trenta cori d’Arcangili fistanti
e’ lati d’un gran tronu di cristallu
e d’oru finu.
Senza cchiù hiatu,(’un ci viniva a ddiri
mancu ‘ bbongiornu’ ddu mumentu dda,)
’un putennu parlari assintumà
e si livà di ddu maluchiddiri
pi lu mumentu.
“Svegliati Serafino vieni avanti”
Finu aprì l’occhi e quannu u talià
cci dissi sulu: “ Maistà piata! ”
Po’ a lingua grossa e la vuci trimanti
lu mpasturaru.
“ Su vieni,vieni,non farti aspettare
non senti con che gioia t’accogliamo?
Vedi con quanto amore festeggiamo
chi il Paradiso si sa conquistare?
E siamo lieti!”
“ Po’ essiri? Po’ mancari a Vossia?
U Paradisu…i canti…vah, vah, vah…
“ E siamo lieti!” E s’a lieticità
nun è nni chistu Rregnu cu Vossia
unni po’ stari?”
Vinti cori d’Arcangili sintennu
dda risposta riieru soni e canti:
“Gloria al Signore! Osanna” e milli santi
acclamaru sunannu ed arridennu
p’a cuntintizza.
E Finu vitti n mezzu a dd’armunìa
i du’ santi d’u bar Raffieli e Francu
cantari unu abbuttatu e l’antru stancu
comu s’assiru avutu a ntipatìa
tutta dda festa.
Po’ lu Signuri a tutti li so’ santi
cci fici attu pi ddiri : “ Itivinni
ca staiu cu Sarafinu” E si ì a tinni
vicinu a dd’arma minuta e trimanti.
Facci cu facci.
“Tu veni ’i Rafadali. ’Stu paisi
santi nn’ha’ datu picca : Patri Spotu…
quarchi antru patri scanusciutu… gnotu…
p’u rrestu siti comu i Sabbittisi…
i Giancascisi…
A un certu puntu u Signuri u talìa
e cci fa “ Sarafì, tu ha’ statu fissa
è nnutuli ti dicu a mezza missa
ha’ statu troppu bbonu anchi pi mmia
Eh chi! Si tratta!
I n Paradisu ’un ci vogliu bbriganti,
ma mancu vogliu bbabbi, Sarafinu.
I chistu postu l’haiu disiatu chinu
di santi ntillicenti, entusiasmanti,
foddi d’anuri
e ’un ci haiu arrinisciutu; su’ purtati
c’ormai nun hannu la mezza misura
o cantanu e allavancanu li mura
o vannu appressu a li sdirraggiunati
a cuntrastari
u Rregnu dei Cieli ca nun piaci…
la munarchia…Mità stannu siddiati
dici ca vonnu i putiri allargati
e fannu vuci ’un si dunanu paci…
picchì? Sopidda!
“ Volemo la Repubblica. Al Senato,
alla Camera nostri rappresentanti :
abbasso il nepotismo! Solo i santi
ch’alle nostre proposte diano fiato”.
Cagnara…vuci …
Si quarcunu assi dittu “ Ha’ cuntrastari
cu li to’ santi “ I cci assi dittu: ‘ Bbellu
cca n Paradisu ’un si nn’arma bburdellu!’
Emmeci su’ arrivati a scioperari
contro il Creatore!
A mmia no, ca cci sugnu abbituatu,
ma me’ Patri e me’ Matri, criatura,
sèntinu santi e cci vennu i dulura
chi bbo’ Sarafinè s’ hannu sdignatu
e tortu ’un hannu.
’Sti scioperanti ’un capiscinu nenti
penzanu comu nn’u munnu lassatu
’un si rènninu cuntu ca u bbiatu
cca cci sta sulu p’essiri cuntenti.
Vinemu a nantri.
Quann’antura ti mannavu a chiamari
era p’aviri quarchi chiarimentu
n capu a to’ vita, u to’ cumportamentu…
ma viu ca cca cc’è picca di truvari:
sulu ’sti fogli.
Cc’ è nn’u dossier ca tu si’ comunista.
Va bbè!Ma ’stu partitu, tranni ’i tia,
di cumunismu ancòra chiacchiarìa?
U proletariu russu antifascista
nun è mpiegatu?
Ormai su’tutti nni la borghesia
c’ ha statu sempri lu sonnu sunnatu
d’u iurnataru pouru, arraggiatu,
ca antru nun spirava e nun vulìa:
fari u patruni.
Di chista ggenti u to’ paisi è chinu
d’arrinanzati, tu fa l’idealista…
Ristasti sulu. U munnu cumunista
si sdirrupà c’ u muru di Berlinu
N mezzu la ggioia.
E la to’ fedeltà, c’ ha’ statu un vantu,
a li politici cci ha’ ffattu diri :
“N capu chist’omu cci putiti iri
a la grossa, u capiti?E senza scantu:
ch’è un picuruni!”
Lu sa’, Sarafinè, ca n capu ’i tia
n capu lu to’ “abbonè” i puliticanti
s’hannu riutu i palazzi cchiù ganti
e s’hannu sulu rricurdatu ’i tia
pi l’elezzioni?
Ca chista ggenti ca t’ha ncuitatu
quann’i cosi ’un ci quatranu, un s’affrunta
cangiari peddi e partitu si a cunta
nun veni grossa comu avìa spiratu ?
Tu? Nun si’ nuddu!
Ti parlu n cumbidenza, tu si’ onestu,
ma tanti, comu tia, nun fannu casu
a ’st’omini di nenti e dannu lasu
cu lu propia silenziu, a un disonestu.
E u porcu rregna.
Su’ ’st’omini ca mi fannu affruntari!
U sa’ cu fa antimafia o’ to’ paisi?
Ggenti ca mancu na’ vota n d’on misi
si v’assetta pi ddiri: “ E’ travagliari!
sugnu pagatu!”
Ma tu sì sa’ cu è chi cci va ffa’
quannu parla e fa scuma ? Chi ti duna?
Picchì nun lu va pigli a timbuluna
quannu fa leva n capu a to’ onestà
p’aviri anuri?
Po’ dicinu ca u Sicilianu è spertu,
ma unn’ è ’sta spirtizza ?I nun ci a viu.
T’u dicu spogliu d’a vesti di Ddiu.
Amaramenti. E cu lu cori apertu.
Unn’è a spirtizza
si di mill’anni ’un ha’ cangiatu nenti ?
S’ ha’ fattu iri u munnu comu ha’ iutu?
Si avennu la palora resta mutu ?
Si penza p’iddu sulu e p’antru nenti?
Qual è a spirtizza ?
’Un aviri travagliu?, strumentari
custani novi e chiaghi a società ?
ndustrializzannu una disonestà
c’ormai nun sapi cchiù d’unni pigliari?
Chist’è spirtizza?
Ma nzumma basta! ’Un ci vogliu pinzari.
’Un mi vogliu amariari u Paradisu.
Mi spovu, Fì , chi bbò? Mi sentu offisu
picchì ’sti cosi mi fann’arrabbiari
e seriamenti.
No, certu, certu, la Sicilia è una
p’ omini intuitivi… ntillicenti…
però m’u dici a chi serbi ’sta ggenti
s’un s’afferma nn’u bbeni e abbannuna
l’usanzi antichi ?
Aiutati ca Ddiu t’aiuta. E’ bberu ?
Ma s’un ti cutulii a ccu è aiutari ?
Mi lu vo’ diri tu chi pozzu fari ?
Ti pozzu accumpagnari o cimiteru
Requematerna.
Comunqui bbasta.’ Un ti vogliu siddiari.
Si’ n Paradisu, ti cuitasti a testa,
e nni ’stu postu si fa sulu festa
l’unicu sirbizzu to’ è cantari
anchi a la n capu.
Si ha’ quarchi disidderiu po’ parlari.
I godu di la vostra cuntintizza
cca ’un c’è malingunìa, nun c’è tristizza
ha’ un spinnu? E ti lu vidi rrealizzari
nni ’stu minutu.
Forza!” “ Cci ha pozzu diri na palora?
Maistà ’un mi sentu d’essiri bbiatu.
Di tutti i cosi chi Vossia ha cuntatu
nun c’è na cosa chi mi lassa fora
d’a so’ amarizza.
Si Vossia voli mi nni vaiu. Scinnu
nn’u Limbu o’ Mbernu, unni mi tocca iri.
Spertu ’ un ci haiu statu ma’, chi pozzu diri?
E sacciu ca di bbabbi ’ un avi spinnu
mi fazzu a truscia?
Haiu avutu bbisognu, ed haiu campatu
comu campanu tutti li puureddi :
a la iurnata; n capu a propia peddi,
ma dannu u pani a li figli umitiatu
di lu suduri.
La pulitica ’ un ha’ statu pi mmia
haiu cridutu ca ’ un c’è nenti ’ i mali
s’unu avi a casa, un piattu ’ i pasta aguali
o cristianu ca suda e fatìa…
chist’haiu cridutu.
S’ i pulitici, mmeci, hannu pinzatu
fari carrera propia n capu ’i mia
chi pozzu diri? Apparteni a Vossia
ggiudicari ’sta ggenti; i haiu vutatu
cu a mani n cori”.
“ Tu chi cugnomu ha’?” “ Candore”.“Appuntu”.
“ Sbagliavu arrè?” “ Chi bbo’ realizzari?”
“ Avissi un sonnu, so’ Maistà, taliari
s’a me’ famiglia, di mia fa cuntu
o è scutulata”.
“Ha’ aviri d’ora n po’ un pinzeri fermu
c’a to’ famiglia è chista, mi capisti?”
Sbattì li mani; e centu specialisti
n d’on secunnu appruntaru un maxischermu
di centru metri.
E Sarafinu si vitti stinnutu
ancora mortu, nn’u mezzu d’u lettu
comu s’avia lassatu. N capu u pettu
u stessu hiuri ancora cchiù ammusciutu
quasi fitenti.
“ Quantu strata haiu fattu ’i ’sta matina
e lu me’ corpu è dda, fermu, minutu.
Fina ca ’un feti! Forsi lu tabbutu
cci lu portanu dumani matina
ca si fa tempu.
Chidda è me’ mogli, so’ Maistà,’ossa vidi?
Stancaomini Franca fu Gaitanu.
Sta chiuiennu u casciuni ’u cantaranu
ed avi un bacu, ma di chi’un si vidi .
E’ siddiata.
E chiddi, so’ Maistà, su’ li me’ figli
Marriannina e Luvici. Marianna
è ddevorziata e Luvici e ’na canna
o’ ventu e ’un voli né cerca cunzigli
ch’ è prevessuri !
Ma s’ un travaglia, ch’è ddesoccupatu,
leva di fari ddannu a tanta ggenti
quannu firma si mroglia comu nenti,
arrussica, s’annerba e sta artaratu
com’un lapuni.
Pinzassi siddu avissi a fari scola!
Veru ca ormai…comunqui! So’ Maistà
me’ muglieri è furiusa, ma chi fa?
Cerca n d’on bacu di carta stagnola
chi cosa ’un sacciu.
“ Serafì cerca sordi!” “ I ’un nni lassavu!
E ccu mi l’avìa dari i sordi a mmia ?
Nn’u bbacu cc’è quarchi fotografia
ggialla, d’u tempu ca mi maritavu
quann’era virdi.
Chi fannu li me’ figli nn’a cucina,
chianginu? La mancanza me’ cci doli?”
“ Cu mori mori u mangiari cci voli”
“ Chistu dicinu ed hannu na gaddina
intra a pignata”.
“ Maistà chiuiemu ’stu cullegamentu?”
“ Chiuiemu, Fi, ma lassa fari a mia”.
Sbatti li mani e comu pi maggìa
u schermu scumparì. A centu a centu
angili e santi
a rriga, a stormu , a curuna, n filera
vinivanu purtannu cuntintizza
e na musica comu na carizza
facìa di tuttu ddu ncantu na spera
d’ amuri vivu.
Cu un’arpa, cu una cetra, cu un viulinu
cu na viola d’amuri… ogni bbiatu
gudìa sunannu un strumentu ntunatu
n capu l’amuri d’u cori ddivinu,
mparadisatu.
“ Subbitu vegnu” dissi Sarafinu
a lu Signuri ca si nni prigava
e si purtà luntanu d’unni unniava
u sonu d’un circu, d’un sunaglinu
nun sempri a tempu.
Turnà sunannu i du’ strumenti a manu
comu si cci l’avissru mparatu
bbellu, patruni di l’arti, varatu
a un ritmu latinu – amiricanu.
Era felici.
Ma cchiù cuntenti d’iddu eranu i santi
Raffieli e Francu c’ ormai libbirati
di na cunnanna, davanu vasati
a Sarafinu ca li celi ganti
s’iva tissennu
comu palumma ’ i cca banna e dda bbanna
accumpagnatu di Raffielie Francu
luminusi nn’u càmmisu bbiancu
gridannu : “Allelluia! Osanna! Osanna!
Ora e pi sempri!”.
da “lustrura d’acqua”
di mimu gallettu
